YUR, MUHABBAT Oy yuzidan nur yog‘di sim-sim, Yur muhabbat, ketdik bu yerdan. Shirin tushlar ko‘rsin sevgilim, Yur, muhabbat, ketdik bu yerdan. Biz ketsak yer kengayib qolar, Osmon ham sal enkayib qolar, Bir qora ko‘z jilmayib qolar, Yur, muhabbat, ketdik bu yerdan. Na qildim, ey yuzlari zebo, Aybim ne deb so‘rama aslo. Bu dunyo shundayin bevafo, Yur, muhabbat, ketdik bu yerdan. Sen dilimda yashnagan chechak, Biz birgamiz qayda yashasak, Ne qipti bir qizga yoqmasak, Yur, muhabbat, ketdik bu yerdan.