Donishni qiynab to‘ymagan, Holi-joniga qo‘ymagan, Nodon bilan kulib o‘ynagan, Pixini yorgan dunyosan. O‘g‘rini siylab ovloqda, Oshini maqtab tovoqda, To‘g‘rini qiynab sirtmoqda Loylarga qorgan dunyosan. O‘tga bostirib dalani, Suvga cho‘ktirib qal’ani, Otadan oldin bolani Jonini olgan dunyosan. Ulug‘in xo‘rlar senmasmi — To‘rga o‘tqazib nokasni, Ot o‘rniga yo‘lbarsni Qo‘shiga solgan dunyosan. Kim ham ishonar nozingga, Bahoring o‘xshar yozingga. Kuylaring tushmas sozingga — Qo‘shig‘i yolg‘on dunyosan!.. Oq ro‘mol o‘rab otinday, Tovlanma menga oltinday. Bola ko‘rmagan xotinday — Allasi yolg‘on dunyosan!